英格蘭又出場喇！呢支最受香港人歡迎國家隊，搵捷克拍跳備戰世界盃外圍賽，擺明恰人青黃不接容易食啦！我周姐輪第一次同大家見面，頭炮就推介英格蘭2.7倍「讓球主勝」，淨贏兩粒冇難度！（now671台周四凌晨3:00直播）
卡比路執「三獅軍團」之後，陣營內氣氛完全唔同哂，鬼叫佢出晒名係用鐵腕治軍咩！依家有得落場球員都搏到盡，卡帥仲公布今仗會由泰利擔任隊長，賽前先穩定軍心。另方面奧雲同卡域克受傷並冇帶太大影響，好似奧雲咁，近幾年見醫生多過見佢屋企人，相反迪科爾同希斯基呢邊緣射手落到場實交足功課。最緊要仲係林柏特同謝拉特呢王牌中場無傷無病，淨係睇佢百步穿楊都夠啦！捷克易帥有排執 捷克歐國盃後有中場骨幹加拉錫退役，路斯基又長抖，真高拿冇入選，連比較似樣個史安高都傷埋。唔好唔記得施治踢國家隊表現差過踢車路士，而前鋒巴路士亦已經係強弩之末，前中後三線都有隱憂。
咁都不特止，捷克最濕滯係「老狐狸領隊」布克拿離任，改由佢副手兼前國腳拉度執，就算拉度係神仙，青黃不接問題亦唔可以一朝一夕解決，佢仲話明會畀中場拉諾治呢「牛奶仔」上陣吸收經驗，咁即係試陣第一，贏波第二啦，咁冇戰意點掂呀？所以我周姐輪就誠意向大家推介英格蘭可以溫布萊高奏凱歌，讓球主勝放心捧場啦！
| 
