| 正所謂新官上任三把火，聽朝洛杉磯銀河主場對芝加哥火燄，記住捧上盤！事關銀河請到前美國領隊阿連拿執，仲立即搵到老友沙達達恩做助倒戈，加上當路雲同卡路士雷斯兩主力講明會趕返披甲，絕對有力撲熄冇白蘭高等多名主力火燄。（now633台周五早上10:00直播）
銀河近日正式聘得阿連拿執球隊，呢位領隊來頭甚猛，九六年第一次美職球隊華盛頓聯隊，就連續兩年為佢取得總冠軍，之後美國國家隊八年，○二年仲帶領「花旗國」歷史性殺入世界盃八強，功力非常深厚，難得佢上任後仲搵老友沙達達恩做副手，咁沙達達恩○二至○七年就過銀河今場對手火燄，對佢可謂瞭如指掌，呢場肯定可以畀到唔少好料阿連拿。 火燄領袖白蘭高缺陣 雖然銀河今場因為撞正國際賽日，有中場碧咸缺陣，不過美國前鋒當路雲同危地馬拉射手卡路士雷斯卻承諾踢完太公波後，會立即趕返洛杉磯為銀河比賽，配合新進射手艾臣布度，鋒力曳極有個譜！加上呢場係阿連拿上任後首次領軍出戰，班球員肯定搏命搶W啦！
相反聯賽被華盛頓聯隊終止十場不敗走勢芝加哥火燄，今場有精神領袖白蘭高被墨西哥新帥艾歷臣說服重返國家隊，中場柏巴同後沙加利斯亦各自返危地馬拉及哥斯達黎加國家隊報到，三線都各有重心缺陣，朱楓真係睇唔出佢可以撻得出火！
| 
